عشر حاجات

النهاردة و أنا ماشي للشغل الصبح جه في بالي حاجة غريبة شوية شفت أطفال راكبة و رايحة مدارسها قلت لما أتسلى.... قلت يلا أفكر أيه أكتر 10 حاجات بحبها في الأطفال أنا إستغربت ده أنا حتى مش بعرف أتعامل معاهم بس لقيت إن فعلاً في حاجات كتير بحبها فيهم حاجات صغيرة بسيطة زيهم من الحاجات دي :-
1- بحب أوي لما يبوصوا من شباك العربية بكل إنبهار لعالم بالنسبالهم جديد و مثير
2- لما يعيطوا جامد أوي و مرة واحدة عشان حاجة تافهة أوي يضحكوا من قلبهم
3- بحبهم أوي و هما نايمين ملايكة فعلاً و لما يصحوا وسط ناس ميعرفوهمش و يجروا على أول واحد يعرفوه و يحضنوه
4- بيبقوا جمال أوي لما يعملوا نفسهم أقوى منك و أنت تعوم على عومهم تخليهم يغلبوك
5- وبحس بإستمتاع خاص لما يسألوني على حاجة معلومة أو سبب و ألاقي عينهم وسعت من كتر الإنبهار
6- أما بقى لو طفل من اللي هو سنة أو لسه متعلم المشي و بيحاول يشوط كورة دي بقى مـ ... تـ ...عـ ... ـة
7- لو طفل رضيع و قايم من النوم مفتح نص عين و قافل التانية و مطلع ربع لسانه برة بجد بيبقى عايز يتاكل
8- لما يا حارم يبقى تايه من أمه و بيعيط و خايف حتى يقولي هو بيعيط ليه
9- لما تديهم شوكلاته أو أي حاجة حلوة و يتكسف و يستخبه ورا مامته
10- لما يسلم عليك و إيده زي النقطة في أيدك و مبتسم ويقول (إزيك يا عمو) و أنا يدوبك لسه بقول أنا حدخل عالم "الكبار"
كل ده بيجي في بالي و أعد أضحك بس أرجع و أفتكر و هما شياطين و أقول والله أبداً دول عايزين الحرق أنا عارف إني عامل فيها جامد و أول مبشوفهم بتنطط و أحس إني رجعت لسنهم و ألعب معاهم بس لأ أنا مش عايز لا أتجوز ولا أخلف بلا أرف ولا أيه؟؟؟؟؟